Theo Walcott បញ្ជាក់ថា ក្រុម Arsenal នឹង​ស្រោចស្រង់​យុទ្ធនាការ​នៃ​ក្របខ័ណ្ឌ Champions League របស់​ពួកគេ​នៅពេល​ជួប​ក្រុម Bayern Munich នៅ​រាត្រី​ថ្ងៃ​អង្គារ​នេះ តាមរយៈ​ការព្យាយាម​ដណ្តើម​ឲ្យ​បាន​ជ័យជម្នះ​ដូច​ក្នុងពេល​ពួកគេ បំបាក់​ក្រុម Manchester United អ៊ីចឹង​។

​ក្រុម​របស់លោក Arsene Wenger កំពុងតែ​ស្ថិតក្នុង​គ្រោះថ្នាក់​នៃ​ការខកចិត្ត​ក្នុងការ​ឈានទៅ​វគ្គ ១៦ ក្រុម​ចុងក្រោយ​ជា​លើក​ទី​១​ក្នុង​រយៈពេល​១៦​ឆ្នាំ ក្រោយពី​ការរង​បរាជ័យ​ពីរលើក​ជាប់ៗ​គ្នា​។

​ក្រុម​កាំភ្លើង​ធំ​មួយ​នេះ បាន​រង​បរាជ័យ​នៅលើ​ទឹកដី​ក្រុម Dinamo Zagreb ហើយ​បន្ទាប់មក​បាន​ជួប​ភាពអាម៉ាស់​នៅលើ​ទឹកដី​ខ្លួនឯង​ក្រោម​ថ្វី​ជើង​របស់​ក្រុម Olympiakos ដើម្បី​ធ្វើ​ឲ្យ​ពួកគេ​មិនមាន​ពិន្ទុ​សោះ​នៅ​បាត​តារាង​នៃ​ពូ​ល F​។

​ការរង​បរាជ័យ​មួយ​ផ្សេងទៀត​នៅពេល​ជួប​ក្រុម Bayern នៅ​កីឡដ្ឋាន Emirates នឹងធ្វើ​ឲ្យ​ក្រុម Arsenal ស្ថិត​យ៉ាង​ប្រកៀក​ក្នុងការ​ធ្លាក់​ចេញ​ដ៏​មិន​នឹកស្មាន​ដល់ ហើយ​ស្របពេល​ជាមួយគ្នានេះដែរ ការ​ស្ថិតក្នុង​ទម្រង់​លេង​យ៉ាង​ល្អ​នៅ​រដូវ​កាល​នេះ​របស់​ក្រុម​ម្ចាស់ ជើងឯក​អាល្លឺម៉ង់ Bayern នឹងធ្វើ​ឲ្យ​ពួកគេ​កាន់តែ​មានការ​លំបាក​ក្នុងការ​យកឈ្នះ​លើ​គូ ប្រជែង​របស់ខ្លួន​។​

​ទោះបីជា​យ៉ាងណា Arsenal នឹង​ឈានទៅ​កាន់ការ​ប្រកួត​ដ៏​សំខាន់​នេះ​ជាមួយនឹង​ទម្រង់​លេង​យ៉ាង​ល្អ ក្រោយពី​បាន​យកឈ្នះ ៣-០ នៅលើ​ទឹកដី​ក្រុម Watford កាលពី​ថ្ងៃ​សៅរ៍​។ ខ្សែប្រយុទ្ធ​អន្តរជាតិ​អង់គ្លេស Walcott អះអាងថា ក្រុម​មាន​មូលដ្ឋាន​នៅ​ទីក្រុង​ឡុង​ដ៍​ភាគខាងត្បូង​មួយ​នេះ មិនមាន​ហេតុផល​អ្វីដែល​ត្រូវ​ខ្លាច​ក្រុម Bayern ឡើយ ប្រសិនបើ​កាំភ្លើង​ធំ​អាច​ទម្លុះ​ខ្សែការពារ​ពួកគេ​ជាមួយនឹង ទម្រង់​លេង​បែប​ប្រយុទ្ធ​ដ៏​ខ្លាំងក្លា​ដែល​បានធ្វើ​ឲ្យ​ពួកគេ​ទទួល ជ័យជម្នះ ៣-០ លើ​ក្រុម Man United ក្នុង​ការប្រកួត​ក្របខ័ណ្ឌ Premier League កាលពីដើម​ខែតុលា​។

Walcott បាន​ឲ្យ​ដឹងថា​៖ «​យើង​គ្រាន់តែ​ត្រូវការ​ស្រោចស្រង់​ពី​ការប្រកួត​ពីរលើក​ដំបូង​។ យើង​ដឹងថា យើង​អាច​ណ្តើ​ម​បាន​លទ្ធផល​នៅពេល​ប្រកួត​ជាមួយ Bayern Munich ហើយ​យើង​ពិតជា​ចង់​ធ្វើ​ឲ្យ​បានល្អ​»​។ Bayern បានទទួល​ជ័យជម្នះ​ក្នុងការ​ធ្វើដំណើរ​ទៅ​ប្រកួត​នៅ​កីឡដ្ឋាន Emirates ២​លើកចុងក្រោយ​របស់​ពួកគេ ដោយ​លើក​ទី​១​ឈ្នះ ៣-១ កាលពី​ឆ្នាំ​២០១៣ និង​ឈ្នះ ២-០ កាលពី​ឆ្នាំ​២០១៤​។

​ការប្រកួត​នៅ​រាត្រី​នេះ នឹង​ចាប់ផ្តើម​នៅ​ម៉ោង​១:៤៥​ទៀបភ្លឺ ៕

​ប្រភព​៖ cambosport
​